Tuesday, April 29, 2008

وعمرك يافسيخ ماكنت يوم شم النسيم شربات

وعمرك يافسيخ ماكنت فى يوم شم النسيم شربات
على فكره ياجماعة الخير بكره جاييكم يوم بيسموه شم النسيم
وانا مبعملش دعاية له لأنه مش من أعيادنا ولا مناسباتنا
وحتى ولو سموه عيد الربيع وجابو بنادى الشياطين الحمر أليسا وحمائى فيه يغنو
المهم الناس فيه بتاكل فسيخ ورنجه وملوحه وسردين مملح
وبسرعة كده معلومة طيارى عن طريقة عمل الفسيخ

بياعين السمك بتجيب السمك إللى متبعش ومعروض خمس ست ايام ومأدد بيفردوه ويحطوه فى الشمس لغاية ما يجيف ويبقى ريحته ولامؤاخذه ....وبعدين يرشوا فيه وعليه ملح ويعبوه إما فى صفايح مصدية أو صفايح الزباله لاتفرق عنها وكلها صدأ مجنزر او براميل أشبه ببراميل النفايات إللى بيرميها الملاعين بتوع السفن فى البحر المتوسط أدام شواطئنا وبعد كده الميه أو الصوص والعياذ بالله اللى حتنزل منه بتكون ميه ملوثه ومركزه وتجيب الأمراض


ونظرا لأن الرعاية الصحية وأقسام الطوارىء بمستشفياتنا ملهاش مثيل وعندنا ميه مية فإخوانا المسؤلين عن صحتنا مابيهتموش أصلا بينا طول السنة فمابالكم باليوم ده وهمه ناقصين قرف المتسممين !!! ونظرا لأن سنويا بيحصل حالات تسمم فى اليوم المشؤم ده والناس مبتبطلش اكل ملوث او بالأصح معدتش بتدور إيه الملوث وإيه المسرطن
ياريت نحاول فى اليوم ده نستفاد ولانكسبش وزر من رب العالمين ولا مرض ولاتسمم
أوتيجى الطوبه فى المعطوبة وتبقى فضيحتنا بجلاجل وتيجى سيرتنا فى 90 دقيقة او العاشره مساءا
او البرنامج البيض إياه
وبس

قل إمرأة ... ولاتقل مزه

قل إمرأة .... ولاتقل مزه
يمكن من الكلمات الخايبه إللى الحمد لله عمرى ماقلتها
هى كلمة مزه فى إللى بكتبه

وإن كان فعلا مافى حد من مذيعين الخلاعة ولا شباب الشوارع
ولاحوارات شباب مخنثين السينما
إلا وقال مزه وموز وحتى قالو عندنا ببورسعيد ساعات ساعات البعض بيقول عليهم
بنات لوز


ونيجى لبعض البنات والحريم على الفيس بوك عملين حملة ضد كلمة مزه
وكاتبين بالبونط العريض

قل إمرأة ولاتقول مزه

وأنا معاهم طبعا وخصوصا إن نظره الجماعة الخايبين التحرريين على إن المرأة عنوان
الإثاره و....و.... سامحونى مش حأكتب حياءا كما علمنى دينى وإحتراما لآدمية الأنثى

ولكن ياريت مجموعة البنات دى تعمل حملة لتوعية البنات والستات والعياذ بالله
من ضرورة لبس الهدوم المحترمة والإحترام فى مشيتها وتعاملها مع البياعين
وزملاتها الرجاله فى العمل وحتى ركوبها المكروباظ

مع إنى كلامى ده الواد طارق الألفى الحاقد والكسول ممكن يقول عنه أنه
تهجيص و حرق جاز ووفر البؤيين بتوعك وكله عارف الكلام كله
ياإسلام افندى


وياريت يهاجموا مخرجين أفلام الإثاره والشهوة الله يكسفهم ويفضحهم
وإللى دلوقتى بقى عددهم أكثر من دبان الصيف وكل يوم تلاقى شوية عيال
طلعين أد ولادى والعياذ بالله ومعندهاش دم وآل إيه مخرجين
تخصص إخراج أفلام عديمة النخوة

وحتى بيعللو عرض مشاهدهم الأبيحة الله يفضخهم بأنها بتخدم الواقعية
وتعالج مشاكل المجتمع زى الواد أبو سكسوكه إياه

وربنا يستر لأن سلسلة الأفلام الشذوذية جايه بالطريق
متقلقوش يارواد السينما بعد خيابة أفلام الارهاب والكباب
وبليز إعطنى هذا الدواء
وفرقة الموت وسلسلة حرامية البنوك وعصابة الجوع الكافر
الرايج والمطلوب وإللى بيفكروا بل بداو فيه هو
صناعة افلام الشذوذ
مصرية الاخراج والانتاج والتمسيل
وإللى معترض يسأل جاره أو صاحبه

ياجماعة الخير
والله انا عن نفسى حاسس ومتاكد وبأبصم بالعشر صوابع
إن كتير منا بعاد عن ربنا
يبقى مستنيين إيه ؟؟؟؟ طبعا غضبه بعد حلمه لو متبناش
وللعلم الضنك والغلا إللى إحنا فيه ده
أول الأصيده

الكلام كتير ومعلش سامحونى لأنى بصدعكم
وقبل ماانسى
الله يرحمك يابابا سييد


لما كنت بتشوفى وانا عندى 17 سنه وشهرين وواقف فى البلكونه بفلنتى الداخلية الحمالات
وبنطلون بجامتى وتقوللى عيب يابنى وحرام بنات الجيران تشوف دراعاتك عريانه بالشكل ده

تعالى وشوف يابابا سييد بعض بنات اليومين دول
ربنا يعافينا

وصاحبتنا عماله تنفخ فى إربه مقطوعة ولازالت هى وصحباتها
بيقولو
قوووول إمرأة ولالالالالا تقل مزه
وى
سلام من إسلام

Monday, April 28, 2008

بحبك يادمياط .... ياجارتى بحبك

شوفو ياجماعة الخير
الموضوع مسخ أوى أوى

كلنا سمعنا عن إقامة مصنع لونه أصفر والعياذ بالله
بمدينه رأس البر - دمياط الجديده

وسمعنا
وااحيد يقول أصل الحكومة مدرستش الموضوع كفاية
وااحيد يقول الدمايطه حزانا و حيجيهم المرض والتسمم

ونسمع وااحيد يقول إنتم خايفين ليه من المصنع
ده الخير جاييكو ياأهالى دمياط البواسل

ده حيتبنى على أحدث طراظ ومتأمن توماتيكى
وميخوفش أبدا
وزى شكة الدبوس


ونسمع وسامحونى حاجة تكسف صراحتن من بعض المصريين
المرحبين من أومان المشروع وشغالين لووك لووك والله ينور

من إن المصنع حلو وطيب ومؤدب وإبن حلال

وصراحة وللامانه عندهم فصاحة لسان تهزم الصهاينه كلاميا

وكان آخرتها لما سمعنا منهم نصايح ولا
نصايح بابا سييد الله يرحمه
فى الأحوال المطينه دى

إن لازم أهالى دمياط يتعلموا ثقافة التقنية والصناعات الحديثه والمططوره
بدلا من أن يرفضوا الخير وسنينه وينشفوا الجمجمة ويقولوا مووش عايزين

وبينى وبينكم موضوع الثقافة ده قالقنى حبتين وجايب لى هرش أفقى بمخى
وبقينا نسمع كلام يخوف وميطمنش عن ثقافة المواطن وإزاى يكون عنده ثقافة
وهوه بياكل وثقافة وهو بيمشى وهوه بينام
وهو واقف وغيره

والله العظيم ياجماعة الخير
مافى احسن ولاأثقف ولا أذكى من المواطن المصرى ولا أجدع منه
ومش حنقول حضاره سبعتلاف عام ولا حنقول إن أجدادنا
الأميرالاى تحتمس أوالسلطان مينا موحد القطرين
ولا إحنا ولاد شجرة الدر وغيره

ومش حندقق مع إخوانا إللى مزعلين إخواتنا الدمايطه
بس حنقول ليهم راعو ربنا وتخيلو إنكم ساكنين فى دمياط
وراحة بال وصحة إخواتى الدمايطه أهم من كنوز الدنيا
إللى أنا بحبهم وكلنا مصريين وبنحب مصر

وإن كان البعض ولامؤاخذه بيقول
بحبك مصر وأعشق فلوسك
أو
الدنيا مصالح ياسى صالح شوف مصلحتك

وكفاية إنى كنت يوم الجمعه بعد الصلا بأبيع شبشبين وحتة قماش هناك
ومفيش سيره غير المصنع الكندى أصفرانى اللون

ونيجى للزبده
وموضوع إن فيه تهديد من الجماعة البوعدا بدفعنا غرامة
قيمتها 400 مليون دولار خسيس أو يورو معفن

وده غيرطراطيش كلام وإستفزازهم أو تهديدهم الخايب لينا
وإللى مش حيحرك ولا شعره من راسنا
بإن صورة مصر حتبقى مش كوول
أوحتتأثرسمعتها فى المحافل الدولية والشباب بتاع أوربا الصايع و
وشباب أسواق الاستثمار والجشع العالمى حيلسن عليها

وآل إيه شكلنا حيبقى وحش خالص ومش حيلو عشانا
وكلام هجايص ملوش معنى ولا يتصرف ببيزا إيطالى

فمعلش ياجماعة الخير
متخدوش فى بالكم
دراكولا مصاص الدماء
يقول ويهرصن أكتر من كده


وى
سلام من إسلام